இளம் எழுத்துகள் 2026 | பாடசாலை மாணவர்களுக்கான படைப்பாக்கப் போட்டி

வாசிப்பு மாதம் 2026 – இளம் எழுத்துகள் 2026
“வாசிப்பிலிருந்து படைப்பிற்கு…”

வாசிப்பு என்பது அறிவைப் பெறுவதற்கான வழி மட்டுமல்ல; அது கற்பனை, சிந்தனை, கேள்வி எழுப்பும் திறன் மற்றும் புதிய படைப்புகளை உருவாக்கும் ஆற்றலை வளர்க்கும் அடிப்படையாகும்.

இதனை முன்னிறுத்தி, வாசிப்பு மாதம் 2026ஐ முன்னிட்டு பாடசாலை மாணவர்களிடையே வாசிப்புப் பழக்கம், கற்பனைத்திறன், படைப்பாக்கச் சிந்தனை, எழுத்தாற்றல் மற்றும் ஆய்வுச் சிந்தனையை ஊக்குவிக்கும் நோக்கில் சிறகுகள் அமையம் “இளம் எழுத்துகள் 2026” எனும் பாடசாலை மாணவர்களுக்கான படைப்பாக்கப் போட்டியை ஏற்பாடு செய்கிறது.

தரம் 1 முதல் தரம் 13 வரை கல்வி கற்கும் மாணவர்கள் தமது தரநிலைக்கு ஏற்ப ஓவியம், கதை, நன்னெறிக் கதை, விஞ்ஞானப் புனைவுக் கதை மற்றும் ஆய்வுக் கட்டுரை ஆகிய ஐந்து பிரிவுகளில் பங்குபற்றலாம்.

ஒரு பாடசாலையிலிருந்து பங்குபற்றும் மாணவர்களின் எண்ணிக்கைக்கு வரையறை இல்லை. பாடசாலைகள் சிறந்த படைப்புகளை மட்டும் தெரிவுசெய்து அனுப்ப வேண்டிய அவசியமில்லை. ஆர்வமுள்ள அனைத்து மாணவர்களையும் பங்குபற்ற ஊக்குவிக்குமாறு கேட்டுக்கொள்கிறோம்.

பாடசாலைகள் பொறுப்பாசிரியர் ஒருவரை நியமித்து மாணவர்களுக்கு போட்டியை அறிமுகப்படுத்துதல், படைப்புகளைச் சேகரித்தல், மாணவர் விபரங்களைச் சரிபார்த்தல் மற்றும் படைப்புகளைப் பிரிவு வாரியாகத் தொகுத்து அனுப்புதல் ஆகியவற்றை மேற்கொள்ளலாம். மாணவர்கள் தனிப்பட்ட முறையிலும் நேரடியாகப் படைப்புகளைச் சமர்ப்பிக்கலாம்.

பொதுவான விதிமுறைகள்

• சமர்ப்பிக்கப்படும் படைப்பு மாணவரின் சொந்தப் படைப்பாக இருக்க வேண்டும்.
• இணையம் அல்லது பிறரிடமிருந்து பெறப்பட்ட படைப்புகளைத் தமது படைப்பாகச் சமர்ப்பிக்கக் கூடாது.
• ஏற்கனவே வெளியிடப்பட்ட படைப்புகள் ஏற்றுக்கொள்ளப்படமாட்டாது.
• எழுத்துப் படைப்புகள் தமிழ் மொழியில் இருக்க வேண்டும்.
• ஒவ்வொரு மாணவரும் தமது பிரிவில் ஒரு படைப்பைச் சமர்ப்பிக்கலாம்.
• ஒவ்வொரு பிரிவிற்கும் குறிப்பிடப்பட்டுள்ள சொல் / தாள் அளவு வரம்பைப் பின்பற்ற வேண்டும்.
• ஆய்வுக் கட்டுரைகளில் பயன்படுத்தப்படும் நூல்கள், கட்டுரைகள், இணையத் தகவல்கள், நேர்காணல்கள் உள்ளிட்ட ஆதாரங்களை இயன்றவரை குறிப்பிட வேண்டும்.

சான்றிதழ்கள் மற்றும் அங்கீகாரம்

தகுதியான படைப்பைச் சமர்ப்பிக்கும் ஒவ்வொரு மாணவருக்கும் பங்கேற்புச் சான்றிதழ் வழங்கப்படும். சிறந்த படைப்புகளுக்கு விசேட அங்கீகாரம் வழங்கப்படுவதுடன், போட்டியை ஒருங்கிணைக்கும் பொறுப்பாசிரியர்களின் பங்களிப்பும் பாராட்டப்படும்.

போட்டியில் பெறப்படும் படைப்புகளில் இருந்து தெரிவுசெய்யப்படும் சிறந்த மற்றும் தனித்துவமான மாணவர் படைப்புகள் தொகுக்கப்பட்டு சிறப்பு நூலாக வெளியிடப்படும்.e

“உங்கள் படைப்பு ஒரு போட்டிக்காக மட்டும் அல்ல; ஒரு புத்தகத்தின் பக்கமாக மாறலாம்!”

சமர்ப்பிப்பதற்கான இறுதித் திகதி: 31.10.2026